Marko 14:3–9
Tunampata tena Yesu huko Bethania, makao ya aina fulani siku za mwisho za huduma yake, kwenye nyumba ya Simoni, mwanamume aliyeponywa ukoma hapo awali. Ingawa Marko hawataji watu wanaokula pamoja na Yesu, simulizi hili linalingana na simulizi la Yohana la chakula cha jioni pamoja na Mariamu, Martha, Lazaro, na wanafunzi. Majina, hata hivyo, sio muhimu kwa Marko. Muhimu ni zawadi ambayo Yesu anapokea na jinsi anavyoitikia.
Walipokuwa wakila, mwanamke mmoja alikuja mezani akiwa na chupa ya marhamu ya nardo safi ya bei ghali. Kile mwanamke anachofanya baadaye huwashangaza wageni. Anapasua mtungi na kumwaga yote yaliyomo juu ya kichwa cha Yesu. Harufu nzuri imejaa chumba. Baadhi ya wageni wanaanza kulalamika: “Kwa nini marhamu yalipotezwa namna hii? Maana marhamu hii ingaliweza kuuzwa . . . na fedha hizo wapewe maskini.” Mtungi huu wa marhamu ungeweza kugharimu karibu mshahara wa mwaka mzima, kwa hiyo haikuwa ishara ya kawaida kwa upande wa mwanamke. Lakini wageni wanaanza kumkemea.
Yesu anapinga shambulio lao dhidi ya ukarimu wa mwanamke huyo, akiwaambia wamwache peke yake. Kile wageni wanaona kuwa ni upotevu, Yesu anakitambua kuwa zawadi. Anawaambia kwamba ameupaka mwili wake mafuta kwa ajili ya maziko—zawadi ambayo itakumbukwa muda mrefu baada ya harufu hiyo kutoweka. Bila shaka, anataka marafiki zake wawatunze maskini, lakini Yesu anajua pia kwamba hatakuwa duniani kwa muda mrefu zaidi. Iwe alijua au la, wakati huo, mwanamke huyo alitambua thamani ya kuwapo kwa Yesu na akaitikia kwa upendo. Anampongeza kwa tendo lake la upendo wa kupita kiasi: “Amenifanyia utumishi mzuri.”
Kuthamini kwa Yesu zawadi ya mwanamke huyo kunatukumbusha mafundisho yake hekaluni mapema katika juma hilo. Ingawa thamani ya zawadi hizo mbili ni tofauti sana, Marko anachagua kukazia utambuzi wa Yesu wa wanawake wawili wanaoonyesha upendo kwa njia za kupita kiasi.
Mwanamke mmoja ni mjane ambaye hutoa vyote alivyo navyo (Marko 12:41–44), na mwingine ni mwanamke ambaye hutoa labda kitu cha thamani zaidi ambacho familia yake inamiliki. Yesu anawapongeza wanawake wote wawili kuwa vielelezo vya kutoa kutoka moyoni.
Zawadi ya mjane huyo inatofautiana na mtazamo wa majivuno wa wasomi wa kidini ambao kwa sauti kubwa hutupa sarafu zao nyingi kwenye sanduku la toleo. Zawadi ya kupindukia ya mwanamke huyu ya upako inatofautiana na ubahili wa wageni wengine ambao wanaonekana kutomtambua aliyeketi katikati yao.
Mara nyingi bila kuonekana na bila kuthaminiwa, mwanamke katika hadithi ya leo na mjane hekaluni wanakaziwa kuwa vielelezo vya ufuasi wa kweli katika Injili ya Marko—habari njema kwa wanawake hao wawili na wote wanaoishi kando ya jamii.
Somo hili la Biblia linatoka Angaza: Kuishi katika Nuru ya Mungu, mtaala wa shule ya Jumapili uliochapishwa na Ndugu Press na MennoMedia.