Prezidan Konsèy Administrasyon Brethren Benefit Trust (BBT), Deb Romary, te demisyone sanzatann nan Konsèy Administrasyon BBT a nan dat 5 Jiyè, touswit apre desizyon gwoup delegasyon Konferans Anyèl la te pran sou de pwen biznis ki gen rapò ak pwoblèm seksyalite imen. Li te sèvi kòm prezidant Konsèy Administrasyon BBT a depi Jiyè 2010. Konsèy Administrasyon BBT a te eli li nan Novanm 2010 pou yon dezyèm manda katran; eleksyon sa a te konfime nan dat 4 Jiyè pa gwoup delegasyon Konferans Anyèl la.
“Se avèk anpil tristès mwen te demisyone nan pòs prezidant ak manm Konsèy Administrasyon Brethren Benefit Trust la,” li te di nan yon entèvyou nan dat 10 jiyè. “Sepandan, faktè ki pa t anba kontwòl mwen ki te gen enpak sou travay mwen t ap fè a, ansanm ak fanmi mwen ak Konsèy Administrasyon ak anplwaye BBT yo, te fè li endispansab pou mwen demisyone.”
“Avèk depa sanzatann Deb nan konsèy administrasyon an, nou pèdi yon lidè konpetan epitou yon zanmi,” te di Nevin Dulabaum, prezidan BBT. “Deb te ede pran anpil desizyon enpòtan nan BBT pandan kat dènye ane yo, epi nou pral sonje l anpil.”
Konsèy Administrasyon BBT a te reyini nan dat 6 Jiyè pou reyinyon reorganizasyon regilye li a, epi li te rele Karen Orpurt Crim pou sèvi kòm prezidant konsèy administrasyon an pou ane kap vini an. Yo te eli Ann Quay Davis vis prezidant epi yo te eli Nevin Dulabaum sekretè konsèy administrasyon an. Konsèy administrasyon an te eli tou ofisye antrepriz BBT yo: Nevin Dulabaum, prezidan; Scott Douglas, vis prezidan; John McGough, trezorye; ak Donna March, sekretè.
Nan dat 4 Jiyè, delege Konferans Anyèl yo te eli John Waggoner pou yon manda katran nan Konsèy Administrasyon BBT a. Li te rantre nan reyinyon an pa telefòn epi konsèy la te akeyi l. Konsèy la te akeyi tou Craig Smith, ki te eli pa manm Plan Pansyon Frè yo pou yon dezyèm manda katran.
Nan yon entèvyou ki te fèt 10 jiyè a, Karen Orpurt Crim te di, “Konsèy Administrasyon BBT a ak anplwaye yo remèsye Deb Romary pou katran sèvis ak lidèchip li te bay BBT. Se avèk tristès ak regrè nou aksepte demisyon li nan Konsèy Administrasyon BBT a.”
De pwochen reyinyon regilye konsèy administrasyon BBT yo se yon konferans telefonik 19 septanm ak yon reyinyon nan zòn Altoona, Pennsilvani, 18 ak 19 novanm.
(Brethren Benefit Trust te bay piblikasyon sa a.)